| Eine Fälschung des späten 14. Jh.: Bestätigung des Bäckergewerks vom 18. Juni 1272
Anm.: Dieses Dokument hat sich als eine Fälschung des späten 14. Jahrhunders erwiesen. [SMPK, S. 77]
Wente di gesunde mensche mach nicht wesen lange tyt ane brod, id queme dan von godes gnaden, umme dat hebbe wie Radmanne old vnd nye tu Berlin met vulbord vnser gemeynheit, gegeuen und geuen werk vnd gulde den Beckers vnsen lyuen medeborgers, dat sy dat werk wol scolen holden, alse in dessen buk steit geschreuen: wy dat werk wynnet, di gest der stad teyn schillinge penninghe, vnd derlouen den des werkes wente an dy Cumpen, den sal he don ore rechticheit vnd wesen alle horsam der stad. Vortmer scolen dy beckers tu gesworen meisters des Jares kyfen twe. dy na oren eden scholen geheiten vnd gebiden den Cumpen, dat sy backen nutlich brod, vire oder twe vor eynen pennigh, na vnsen rade vnd geheite; di meisters scolen di stad nicht laten stan ane brod bi der stad broke, och scolen sy norren di Radmanne dat sy gan vp den scharnen vnder dat brod des sondages vnd des middewekes vnd scolen dat besyn, wes nicht des geldes wert is, alz di meisters na oren eden scholen derkennen vnd segghen, so hebbe wi macht also vele brodes alse vp die scharne is, tu gebidene tu dragene in di arme beide houe vnd dat ander scolen di meisters setten a werde. Vortmer wy dat werk wynnet, die sal vor des meisters ouen backen, dat men befyet, ofte he syn werk kan, vnd welk becker na der wynnunge des werkes elike sone gewynnet, den eruen sy dat halue werk vnd gulde na vnser vulbord. Ok worden di cumpen verbodet vnd enger dar nicht tu queme dorch vnhorsamicheit, den mogen sy panden vor fes pennighe. Ok mogen sy nemen tu broke ane eynen penning dri schill. von deme, di dat vorboret. Breke ymand vorder vnd groter, dat schole di meisters bringen vor dy Radmanne, di scholen dat richten na gnade, daraf fal di stad hebben twe deil, di cumpen dat dridde. Ok wil wi, dat dy gemeyne Cumpen horsam scholen wesen oren gesworen meysters, wat sy em gebiden von der stad wegen vnd vnse gehente. Dorch kenntnisse wille hebbe wi en gegeuen dessen briff besegeld met vnser stad Ingesegel. Gegeuen na gods gebord im dusent vnd twe hundert vnd twe vnd fouentig Jare, des sonnabendes na pingesten.
|